مامن اوجوه اسماح (بوعياد)

مامن وجوه اسماح .. ما سمعت فيهن قول سوك راح .. اللي فارقن

مامن اللي واعر عليك اغيابه .. وموارات شخصيته ورد وجابه
وين ما الزمان اتسيرلا نكرابه .. وارياحه اتكون امباشرة بنزاح
هناك وين يشّرع الفاهق بابه .. لجواد فقدهم منه اتحس اجراح
ومامن اللي فارق وما تشقابه .. وان قالو لفا لقلوب ما تفراح

ما من الوجه الناير .. اللي عمر ما طبعه امعاك ايغير
لاكن الكون الله فيه ايسير .. ويفارق اللي مالكون نجمة طاح
وايام الدهر تمتاضلك وتمير .. ويجلك الله وفاليدين اسلاح
وهذي الدنيا كل نهار ادير .. علي مطايرك تسفي بشكل ارياح


ما من الوجه الباشر .. اللي كان ما ودك امغير اتعاشر
ولا يصابحوك بوجه عابس كاشر .. ولو العمر كله بهم تصباح
ولا تنظرا فيهم الوجه الحاشر .. عطاهم الله لجواد طلق اسراح
وعندك منايح في اطراف الناشر .. انظاف الضماير فالجوار املاح

ما من اجواد صحيح .. الليل يجبروا بالذكر والتسبيح
ولا جارهم ينظر رقادة ريح .. حتي ولوقات امعاودات اشحاح
وكلاب الفريق امسيبه النبيح .. من كثرة اوجوبها والسنين املاح
حتي وهي الدلو اتجيب بالتمويح .. للهايف امروح طالقه المرواح

اسماح الزوقة .. عالجار المجاور يقسمو فالضوقه
وفي ملكم واخذ جميع احقوقة .. الجار ملكوه البير والمسراح
واصحاب نجع ما ودك امغير اتوقه .. اجواد في طرفهم جارهم يرتاح
وملي سكاين برها مخلوقه .. كل بيت قدامه هناك امراح
وعيونهم مثابت في صفا مدقوقه .. ما من نذير ايسيبو مطراح

مامن اجواد اتعز من جاورها .. اسماح الوتا بحرابها و ادقرها
فراسين واحمايه اسلاح اوبرها .. وين ما رسم في سوقها براح
ولاعند تو اديارهم نخبرها .. نمشيلهن اتقول انزور في صلاح
واللي لا عرف لجواد ولا ناظرها .. مازال مانظر شي للكلام الصاح