بكيــــــــت مريضه للشاعر صالح بو عياد الشهيبي

بكيــــــــت مريضه خوفي من علل واجد وفيه قريضه
للي ينشدك قولي
بكيت ابروحي .... و خلك تهاجي في المسا و صبوحي
راني مريض معقرات جروحي ... و زادن معاي بطول و تعوريضه
من شان خاطري خلك حدايه دوحي ....مريض وينما نبرا طريقك بيضه
ابكي بدموعك ما يسلك والي .... و فضي على بالك و فضي بالي
و اللي ينشدك قولي بكيت تسالي .... عندي دموع العين فيهن فيضه
من شان خاطري نوحي حداي ليالي ... عندي جفن عين اوحلت في تغميضه
بكيت ابصاره ..... و جيبي اعدار تخيل ع الفساره
و الا بكيت محصله غثاره ..... قطير من عرق نازل اوقات القيضه
و عندي دمع راد مع ميوح ابياره .... و لا يروب و لا يصح مخيضه
نبكيه خير ما يمشي على اخساره ..... سبله و صارت طرفتي توقيضه
مريضه زكمه ...... و إلا مريضه من جراير لكمه
و عيون واجده كيفك ولاكن تكمى .... و عيون دايرات السر كي الفريضه
و اللي ينشدك ردي عليه بحكمه ...... نفيض غزل واجد يتعبك تنقضيه
ابكي و ديري صرفه ....... و اللي ينشدك قولي مويه طرفه
سوا من اقراب الدم و لا عرفه ....... خلك على بابه السر حفيظه
و الناس موش ناسك لوله منحرفه .... الناس عندها للصافيه تخويضه
ورا الصبر كي تلقيه حاجه طرفه ...... و المومن إن كان اغتاظ يكتم غيطه
وراه الخلايق كل حد و بظرفه ....... غير فيه من خافي عليك جضيضه