يا طيبك صباح .. للشاعر علي شحات الفاخري

صباح الخير يا طيبك صباح ..
وطيبك صبح يبداه النهار
وطيبك وجه يبعث الارتياح ..
وطيبك صوت نغمةْ من أوتار
وجهك بين الوجوه الملاح ..

فاض بْنور يسرق في الأنوار
نسوم ربيع وان الفجر فاح ..
عطرك فاح عِ الأنفاس غار
فعل بالروح ما تفعل الرَّاح ..
بْشارب زاد شغفه بالمرار
وقلبي قبل نقرب قلت راح ..
سبقني قبل فيك انطول طار
غلاك حْصون محميَّة اجتاح ..
وذلَّ جيوش صَعْبةْ الانكسار
عقلي بين نار غلاك طاح ..
وبين جَمال خاطف للأبصار
فيك احتار يا زينةْ السَّمَاح ..
إن شورك ماح تلعب بيه نار
وكان اختار يجنح للبياح ..
اخطيه الصَّاح واخطي في القرار
وإن دار قرار ظنَّه هو الصَّاح ..
يخشّ بياح لوعةْ الاختيار
فيك أرباح وخسارة أرباح ..
وفيك أقهار وتحيدي أقهار
أنتِ درب خاتمته أرباح ..
وأنتِ درب خاتمته دمار
وبين يديك باللِّي بيه باح ..
قلب رهيف من حسنك انهار
غازي جاك منزوع السلاح ..
ومنك لاذ شورك بالفرار
إن شلتي فيه فاتكات الرَّماح ..
بْحنّ وغلَّ منهن يستجار
اسماه ايريح من ودَّك ارياح ..
وان ما راح حتفه الانصهار
واعتبري كل ما قاله انواح ..
لا هو غزل فيك ولا أشعار
وإن شلتي فيه العيون السماح ..
وتاق الود فيهن والقدار
يبقى طاح في وين استراح ..
ونال أقدار صوبك باقتدار
وهمَّ الليل عن صدري انزاح ..
بجيشه راح لايذ بالفرار
وكل نهار وين الصبح لاح ..
بدري انجيك ونقولك اجهار
صباح الخير يا طيبك صباح ..
وطيبك صبح يبداه النهار